அதிரை Express: நோன்பு

நபி(ஸல்) அவர்கள் மதினாவிற்கு வருகை தந்தபோது ஆஷூரா நாளில் யூதர்கள் நோன்பிருப்பதைக் கண்டார்கள். இந்நாளின் சிறப்பென்ன? என்று யூதர்களிடம் நபி (ஸல்) அவர்கள் கேட்டார்கள். அதற்கு யூதர்கள் இது மகத்தான நாளாகும். இந்நாளில் தான் மூஸா (அலை) அவர்களை அல்லாஹ் காப்பாற்றினான். மேலும் ஃபிர்அவுனையும் அவனுடைய சமூகத்தினரையும் (கடலில்) மூழ்கடித்தான். எனவே அல்லாஹ்வுக்கு நன்றி கூறும் விதமாக மூஸா (அலை) அவர்கள் நோன்பு நோற்றார்கள். அதனால் நாங்கள் நோன்பு நோற்கிறோம் என்று கூறினார். நபி(ஸல்) அவர்கள் நாங்கள் தான் மூஸா (அலை) அவர்களை பின்பற்றுவதில் உங்களை விடத் தகுதியானவர்கள் என்று கூறினார்கள். அந்நாளில் நோன்பு நோற்றார்கள், மேலும் நோன்பு நோற்குமாறு கட்டளையிட்டார்கள். அறிவிக்கும் நபித்தோழர், இப்னு அப்பாஸ் (ரலி) நூல்கள்: புகாரி, முஸ்லிம், அபூதாவூத்

நபி(ஸல்) அவர்கள் யூதர்களின் வழிமுறைக்கு மாற்றம் செய்யும் விதமாக ஆஷுரா நாளின் முந்திய (ஒன்பதாம்) நாளும் நோன்பு நோற்குமாறு கூறினார்கள். மேலும் நான் வரக்கூடிய வருடம் இருந்தேனேயானால் ஒன்பதாம் நாளும் நோன்பு நோற்பேன் என்று குறிப்பிட்டார்கள். ஆனால் அதே வருடத்தில் மரணமடைந்தார்கள். அறிவிக்கும் நபித்தோழர், இப்னு அப்பாஸ் (ரலி) நூல்: முஸ்லிம்.

‘ரமழானுக்குப் பின் சிறப்பான நோன்பு முஹர்ரம் மாதத்தின் நோன்பாகும், கடமையான தொழுகைக்குப் பின் சிறப்பான தொழுகை இரவுத் தொழுகையாகும்.’ என நபிகள் நாயகம் (ஸல்) அவர்கள் கூறினார்கள். (அறிவிப்பவர்: அபூஹுரைரா (ரலி), புஹாரி, முஸ்லிம்).

நபி (ஸல்) அவர்கள் ஆஷூரா தினத்தில் காலையில் அன்ஸாரிகளின் கிராமங்களுக்கு ஆளனுப்பி, ‘யார் நோன்பு நோற்காதவராகக் காலைப் பொழுதை அடைந்துவிட்டாரோ அவர் இன்றைய தினத்தின் எஞ்சிய நேரத்தை (நோன்பாக) நிறைவு செய்யட்டும்! யார் நோன்பாளியாகக் காலைப் பொழுதை அடைந்தாரோ அவர் நோன்பைத் தொடரட்டும்!” என்று அறிவிக்கச் செய்தார்கள். நாங்கள் அதன் பின்னர் அந்நாளில் நோன்பு நோற்கலானோம்; எங்கள் சிறுவர்களையும் நோன்பு நோற்க வைப்போம். கம்பளியாலான விளையாட்டுப் பொருட்களை அவர்களுக்காக நாங்கள் செய்வோம்; அவர்கள் (பசியால்) உணவு கேட்டும் அழும்போது நோன்பு முடியும் நேரம் வரும் வரை (அவர்கள் பசியை மறந்திருப்பதற்காக) அவர்களிடம் அந்த விளையாட்டுப் பொருட்களைக் கொடுப்போம். - புஹாரி : அர்ருபை பின்த் முஅவ்வித் (ரலி).

ஒரு வருடத்தின் ரமளான் மாதத்தை அடைந்து, அதன் நோன்புகள் அனைத்தையும் நிறைவேற்றி, குர்ஆன் ஓதி, தொழுது இன்னும் பிற உபரியான வணக்கங்களையும் நிறைவேற்றி, அம்மாதத்தைச் சிறப்பிக்கும் பாக்கியத்தை அல்லாஹ் நமக்கு வழங்கினால் அதுவே நாம் பெறற்கரிய பேராகும்.

இத்தகு பெரும் பேற்றினை அல்லாஹ் நமக்கு வழங்கியதற்கு நன்றி செலுத்தும் முகமாகவும், நம் வணக்கங்களில் ஏதேனும் குறைபாடுகள் ஏற்பட்டிருப்பின் அவற்றை நிறைவு செய்யும் முகமாகவும் நாம் நோற்ற நோன்புகள் அனைத்தும் ஏற்றுக் கொள்ளப்பட வேண்டும் என்பதற்காகவும் ஸதகத்துல் ஃபித்ரு கொடுப்பதை நம்மீது அல்லாஹ் கடமையாக்கி இருக்கிறான். மேலும் முஸ்லிம்களெல்லாம் ஒன்று கூடிப் பெருநாளை மகிழ்ச்சிகரமாகக் கொண்டாடிக் கொண்டிருக்கும் அவ்வேளையில் வசதியற்ற, வரிய நிலையில் இருக்கின்ற ஏழை எளிய மக்களும் இந்நாளிலாவது அவர்கள் பட்டினி கிடக்காமல் வயிறார உண்ண வேண்டுமென்பற்காகவும் இந்த தருமம் கடமையாக்கப் பட்டிருக்கிறது. ஆக, கொடுப்பவர்களுக்கும் பெறுபவர்களுக்கும் மன நிறைவை அளிக்கும் இந்த தருமத்தை எப்படி நிறைவேற்ற வேண்டும்?

காலம் : நோன்புப் பெருநாள் அன்று ஃபஜ்ரு தொழுகையை நிறைவேற்றிய பிறகு பெருநாள் தொழுகைக்குச் செல்லும் முன்பாக இதனைக் கொடுப்பது கட்டாயமாகும். இதுதான் அதற்குரிய மிகச் சிறந்த நேரமாகும். எனவே, ஒருவர் அன்றைய ஃபஜ்ரு தொழுகைக்குப் பிறகு இறந்துவிட்டாலோ அல்லது ஃபஜ்ருக்கு முன்பாக ஒரு குழந்தை பிறந்தாலோ அவர்களுக்கும் சேர்த்துக் கணக்கிட்டுக் கொடுக்க வேண்டும். இந்நேரத்தில் கொடுப்பதற்குரிய வாய்ப்பு இல்லாவிடின் இரண்டு நாளைக்கு முன்பிருந்தே கொடுக்கத் துவங்கிவிடலாம். இமாம் ஷாஃபியீ (ரஹ்) அவர்களின் கூற்றுப்படி ரமளான் துவக்கத்திலிருந்தே இதனை நிறைவேற்றுவது கூடும்.

எவர் நிறைவேற்ற வேண்டும்? பெருநாள் செலவுகளுக்குத் தேவையான அளவு போக அதிகபட்சமாக எவரிடம் பொருளாதாரம் உள்ளதோ அவர்கள் அனைவரும் ஸதகத்துல் ஃபித்ரு கொடுப்பது கட்டாயமாகும். தனக்காகவும் தன் கட்டுப்பாட்டின் கீழ் இருக்கின்ற தன் குழந்தைகள், பெற்றோர், மனைவி, தன்னிடம் பணிபுரிகின்ற பணியாளர்கள் ஆகியோருக்காகவும் கொடுக்க வேண்டும். எனினும் இவர்களில் எவரேனும் வசதி படைத்தவர்களாய் இருந்தால் அவர்களுக்காகக் கொடுப்பது இவர் மீது கடமையல்ல. அவர்கள் தாமாகவே தங்களின் பொருள்களிலிருந்து ஸதகத்துல் ஃபித்ரை நிறைவேற்ற வேண்டும்.

யாருக்குக் கொடுக்க வேண்டும்? குர்ஆனில் சொல்லப்பட்ட ஜகாத் பெறத் தகுதியானவர்களான ஏழைகள், மிஸ்கீன்கள், புதிததாக இஸ்லாத்தைத் தழுவியோர், அடிமைகளை உரிமைவிடுவதற்காக, அல்லாஹ்வின் பாதையில், கடனில் மூழ்கியவர்கள், வழிப்போக்கர்கள், ஜகாத் பணத்தை வசூலித்து சேகரித்து பாதுகாத் விநியோகிக்கும் பணியில் ஈடுபட்டிருப்பவர்கள் ஆகிய எட்டு வகையினரே ஸதகத்துல் ஃபித்ரை பெறத் தகுதியானவர்கள். எனவே, இவர்களைத் தவிர மற்றவர்களுக்குக் கொடுக்கப்பட்டால் அது நிறைவேறாது. சாதாரணமாக தருமம் செய்த நன்மையையே அது பெற்றுத் தரும். இந்த எட்டு வகையினரில் நெருங்கிய உறவினர்களுக்கும் அண்டை வீட்டாருக்கும் முன்னுரிமை அளிக்கப்பட வேண்டும். முக்கியமாக அனைவரும் முஸ்லிம்களாக இருக்க வேண்டும். காஃபிர்களுக்குக் கொடுக்கக் கூடாது. இறுதி நோன்பின் இஃப்தார் எங்கு நிறைவேற்றப்படுகிறதோ அங்குதான் இந்த ஸதகத்துல் ஃபித்ரு கொடுக்கப்பட வேண்டும் என்று இமாம் அஹ்மது (ரஹ்) அவர்கள் குறிப்பிடுகிறார்கள். எனவே தங்களின் குடும்பங்களைப் பிரிந்து வெளி ஊர்களிலோ அல்லது வெளி நாடுகளிலோ வசிப்பவர்கள் தங்களுக்குரிய ஸதக்கத்துல் ஃபித்ரை தாங்கள் வசிக்கும் இடத்தில் உள்ளவர்களுக்கும், தங்களின் குடும்பத்தார்களுக்குரியதை அவர்கள் வசிக்கும் இடத்தில் இருப்பவர்களுக்கும் கொடுக்க வேண்டும். தாங்கள் வசிக்கும் பகுதியில் ஸதகத்துல் ஃபித்ரு பெறத் தகுதியானவர்கள் இல்லை என்ற நிலை இருக்குமானால் தங்கள் சொந்த ஊரில் உள்ள ஏழைகளுக்குக் கொடுப்பதே சிறந்தது.

என்ன பொருள், எவ்வளவு கொடுக்க வேண்டும்? அரிசி, கோதுமை போன்ற உணவு தானியங்களிலிருந்து மூன்று கிலோ என்ற அடிப்படையில் கொடுக்கப்பட வேண்டும். ஒரு ஊரில் உணவுக்காகப் பயன்படுத்தக் கூடிய பொருள்களையும் வழங்கலாம். எனினும் "பொருளாகத்தான் வழங்கப்பட வேண்டும் கிரயமாக அல்ல" என்பது இமாம் ஷாஃபியீ (ரஹ்) அவர்களின் கருத்தாகும். இமாம் அபூஹனீபா (ரஹ்) அவர்கள், "பொருள்களின் விலையைக் கணக்கிட்டு வழங்கலாம் என்பதோடு மட்டுமின்றி அதுவே சிறப்பானது. ஏனெனில் அதைக் கொண்டு அவர்களுக்குத் தேவையான பொருள்களை அவர்களே வாங்கிக் கொள்ளலாம்" என்பதாகக் குறிப்பிடுகின்றார்கள். சத்தியத்தை விளங்கி அதன்படி செயல்பட வல்ல இறைவன் அருள்புரிவானாக. ஆமீன்.

ஆக்கம் : மவ்லவி, ஹாபிள் நிஜாமுத்தீன் பாக்கவிய்.

அதிரை எக்ஸ்பிரசின் வாசக சகோதர, சகோதரிகளுக்கு முதற்கண் என் இனிய அஸ்ஸலாமு அலைக்கும்.

நேற்று பெய்த மழையில் முளைக்கும் காளான்கள் போல், ரமளான் மாதம் வந்து விட்டால் நமதூரில் ஆங்காங்கே முளைக்கும் வாடா, சம்சா கடைகள்.

பங்குச்சந்தை வர்த்தகம் போல் பரபரப்பாக நோன்பின் மாலை நேரங்களில் நடக்கும் சம்சா,வாடா வியாபாரம். அதனால் அதில் ஈடுபடும் ஏழை, எளிய மக்களின் வறுமை சற்று நீங்கும்.

நம்மூரில் ரமளான் மாதத்தில் நம் குடும்ப, சொந்த பந்த உறவுகளை வலுப்படுத்த (குறிப்பாக சம்மந்தி வீடு) ஒருவருக்கொருவர் ரமளான் பரிசாக் கொடுத்து மகிழும் நோன்பு கஞ்சி, வாடா மற்றும் சம்சா எப்படியெல்லாம் சொந்த, பந்த உறவுகளின் இணைப்புப் பாலமாக விளங்குகிறது என்பது ஒரு ஆச்சரியம் கலந்த உண்மை.

பிறை 17ம் நாள் "பதுருப்படை" அன்று நம் முஹல்லாவுக்குள் ரொட்டி, தேங்காய் வசூலிக்க வேற்று முஹல்லாவாசிகள் நுழைந்து விட்டால் ஏதோ எல்லை தாண்டி வந்த அண்டை நாட்டு ராணுவத்தினர் போல் அவர்களிடம் கடுமையாக அணுகும் முறையை நம்மில் யாரும் மறக்க முடியுமா?

ஜக்காத் கொடுக்கும் நேரங்களில் நம்மூரில் வசதி படைத்தவர்களின் வீடுகளின் வாசல்களில் ஏழை, எளியோரின் வரிசை நியாய விலைக்கடைகளில் (ரேசன்) அத்தியாவசிய பொருட்களின் விநியோகம் போல் நிற்கும்.

இரவு நேர விளையாட்டுக்களில் தேநீர் இடைவெளிக்காக வித்ரு தொழுகை சமயம் பள்ளிக்குச் சென்று தேநீர் அருந்தி விட்டு வந்ததை சம்மந்தப்பட்டவர்கள் மறக்க அல்லது மறுக்க முடியுமா?

தேவையில்லாமல் தெருச் சண்டைகளை விலைக்கு வாங்கி வருவதும், வீடுகளின் வாயில்களில் உள்ள கொய்யா,மாதுளை, மாங்காய் மற்றும் தேங்காய் போன்ற கனிவர்க்கங்களை விளையாட்டாய் அதன் பாவம் அறியாது பறித்து வருவதும் இந்நேரத்தில் தான்.

பெருநாள் நெருங்க, நெருங்க துணிக்கடைகளிலும், தையல் கடைகளிலும் கூட்டம் அலை மோதும். பெருத்த லாபமும் அவர்களுக்குப் போய்ச் சேரும்.

பெருநாள் இரவு நல்ல பல அமல்கள் செய்து இறைவனிடமிருந்து பள்ளிகளில் அமல்களின் மூலம் கூலி வாங்குவதற்குப் பதில் தையல்கடைக்காரர்களுக்கு கூலி கொடுப்பதில் தான் நேரங்கள் செலவிடப்பட்டன என்பதை யார் தான் மறுக்க முடியும்?

பெருநாள் அன்று உடல் மேனி மறைக்க சட்டை அணிந்தோமோ, இல்லையோ? ஆனால் சட்டைப் பாக்கெட்டில் இருக்கும் புது சலவை நோட்டு தெரிய "மார்ட்டின்" சட்டையை விரும்பி அணிந்ததெல்லாம் ஞாபகத்தில் வராமலா போய் விடும்?

சாதாரன நாட்களில் செல்லாத சொந்த, பந்த வீடுகளுக்கெல்லாம் செல்வோம். காரணம் இல்லாமலா? பாக்கெட்டை கனமாக்கத்தான். "பெருநாள் காசு".

பெருநாள் ஒரு நாளுக்கு முன்பாகவே கடைத்தெருவில் உள்ள "பரீதா" மற்றும் "வின்னர்" சைக்கிள் கடைகளில் எல்லா சைக்கிள்களும் நாள் வாடைகைக்காக எடுக்கப்பட்டிருக்கும் பெருநாள் முழுவதும் சுற்றித் திரிய.

பெருநாள் அன்று நம் பள்ளிகளில் பெருநாள் அழைப்பு விடுக்க "நகரா" அடிக்க நியாய விலைக் கடைகளில் வரிசையில் நின்றது போல் நின்றதெல்லாம் ஞாபகம் வந்து உள்ளத்தில் பரவச மூட்டிச் செல்கின்றன.

ஒரு காலத்தில் நாம் பொருளாதரத்தில் பின் தங்கி தான் இருந்தோம். ஆனால் வாழ்க்கையை மன நிம்மதியுடன், சந்தோசமாகத்தான் கழித்து வந்தோம்.

ஆனால் இன்று நம்மவர்களுக்கு அன்றாடம் வரும் புதிய, புதிய பிரச்சினைகளும், வயது வித்தியாசமில்லாமல், காரணமில்லாமல் வரும் புதிய, புதிய நோய்களும் நம் மன அமைதிக்கு வேட்டு வைத்து விடுகின்றன.

இவையாவும் இன்றைய (மேலேக் கூறப்பட்டவைகளை ரமளான் மாதத்தில் பார்க்க வாய்ப்புகள் குறைந்து போன) நம் சிறுவர்கள் மற்றும் இளைஞர்களின் மனக்கண் முன்னே கொண்டு வந்து நிறுத்த நான் எடுத்துக் கொண்ட சிறு முயற்சியே.

சிறு வயது முதல் இன்றுவரை செய்த எங்களின், பெற்றோர்களின், உற்றார், உறவினர்களின், நண்பர்களின், நம் ஊர்வாசிகளின் மற்றும் உலகை விட்டுச் சென்ற நம்மவர்களின் எல்லாப் பாவங்களையும், குற்றம், குறைகளையும் இப்புனித ரமளானின் பொருட்டால் யா அல்லாஹ்! மன்னித்து எல்லாவற்றிலும் எங்களுக்கு பரக்கத் செய்வாயாக! ஆமின். யாரப்பல் ஆலமீன்.

நம் எல்லாப் பிரச்சினைகளையும் தொழுகை மூலம் இறைவனிடம் முறையிட்டு அதற்கான பலாபலன்களை அடைந்து கொள்வோமாக இன்ஷா அல்லாஹ்...

நீங்கள் எங்கிருந்தாலும் இறைவன் அருட்கொடையால் எல்லா வளங்களும் பெற்று நலமுடன், சந்தோஷமாக வாழ வேண்டும் என இப்புனித ரமளானில் இறைவனைப் பிரார்த்தித்தவனாக.

எம்.ஐ. நெய்னா முகம்மது.
சவுதியிலிருந்து.

ஜித்தாவில் அய்டா வின் (AYDA) (இப்தார்) நோன்பு திறக்கும் நிகழ்ச்சி கடந்த 3.9.2008 புதன்கிழமை அன்று மாலை ஜித்தா லக்கி தர்பார் ஹோட்டலில் முதன்முறையாக ஜித்தாவில் அய்டாவின் சார்பில் நோன்பு திறக்கும் நிகழ்ச்சி ஏற்பாடு செய்யப்பட்டிருந்தது. ஜித்தா வாழ் அதிரைவாசிகள் அனைவரும் குடும்பத்துடன் திரளாக வந்து கலந்துகொண்டனர். இந்நிகழ்ச்சிக்கு அய்டாவின் இணை தலைவர் சகோதரர் முகைதீன் அவர்கள் தலைமை தாங்க சகோதரன் ஆதில் அஹ்மது கிராத் ஓத நிகழ்ச்சி இனிதே துவங்கியது. அய்டாவின் இணை பொருளாளர் சகோதரர் A.ஜபருல்லாஹ் வரவேற்புரை வழங்க பொருளாளர் சகோதரர் அப்துல் அஜீஸ், இணை செயலாளர் சகோதரர் நைனா(அஜ்வா), அய்டாவின் மூத்த ஆலோசகர் சகோதரர் B.பஷீர் அகமது மற்றும் பலர் உரை நிகழ்த்தி ஊர் விஷயங்கள் மற்றும் அய்டாவின் செயல்பாடுகள் பற்றி அளவலாவினர். அய்டாவின் தலைவர் சகோதரர் ரபியா அய்டாவின் திட்டங்கள் மற்றும் சாதனைகள் பற்றி சிறப்புரை வழங்கினார். இதுபோன்ற ஊரிலுள்ள நல்ல அமைப்புகள் பற்றி நினைவு கூறும்போது புதிதாய் துவங்கப்பட்டுள்ள 'யுநேடட் பாரம்' பற்றி சகோதரர் சாகுல் ஹமீது (NAFSAL) விளக்கமளித்தார், இதுபற்றி சகோதரர் ஷம்சுதீன் வந்திருந்தவர்களின் கருத்துக்களை கேட்டறிந்தார். இறுதியில் செயலாளர் சகோதரர் A.J. தாஜுதீன் நன்றியுரை வழங்க இரவு உணவுடன் நிகழ்ச்சி நிறைவுற்றது.

அதிரை எக்ஸ்பிரசின் அன்பான வாசக சகோதர, சகோதரிகளுக்கும் என் இனிய அஸ்ஸலாமு அலைக்கும் மற்றும் புனித ரமளான் வாழ்த்துக்களை நேரடியாக கூறமுடியாவிட்டாலும் உள்ளத்தில் உருவாகும் அந்த அன்பு கலந்த பரவசக் காற்றை இப்பாலைவன பூமியில் கரையச்செய்கின்றேன்.

என் இனிய (பழைய) வசந்தகால ரமளான் நினைவுகளிலிருந்து. நோன்பு 17ம் நாள் "பதுருப்படை" ரொட்டி, தேங்காய் மற்றும் திண்பண்டங்கள் சேகரிப்பிற்காக நம்மூரில் வீடுவீடாக படையெடுத்துச் சென்றதும்; அதில் வெற்றி வீரர்களாய் பொட்டி நிறைய திண்பண்டங்களை முஹல்லாப்பள்ளிக்கு கொண்டு வந்து சேர்த்ததும் நம் இனிய ஞாபகங்களிலிருந்து மறைந்து போகுமா?

நோன்பு திறக்கும் சமயம், பள்ளிகளில் கஞ்சிக்குள் வாடா, சம்சாவை அமிழ்த்து வெகுநேரம் மீனுக்காக உற்று நோக்கி காத்திருக்கும் கொக்கு போல கஞ்சிக் கலையானையே பார்த்திருந்த/காத்திருந்த நினைவுகளை நம்மில் யார் தான் மறக்க முடியும்?

நம் பள்ளிகளில் "நகரா" அடிக்க வாய்ப்புகள் கிடைத்து விட்டால் ஏதோ முழு வாழ்க்கையிலும் வெற்றி பெற்று விட்டதாக அப்படியொரு சந்தோசம்....

நோன்பு காலங்களில் பகல், இரவுக் காட்சிகளாக விளையாடி மகிழ்ந்த கண்டு விளையாட்டுகளும், தொட்டு விளையாட்டுக்களும், கிளித்தட்டு, கேரம் போர்டு விளையாட்டுக்களும் அடிக்கடி நினைவில் வந்து பரவச மூட்டிச் செல்கின்றன.

நோன்பு திறக்கும் சமயம் வரை, நம்மூர்க்குளங்களில் கண் சிவக்க குளித்துக் கும்மாளமிடுவதால் காது, மூக்கு வழியே உடலில் தண்ணீர் சென்றால் நோன்பு முறிந்து விடும் என்பது கூட அறியாத பருவம் அது.

சிறு வயதில் "தலை" நோன்பு பிடித்தால் மாலையிலே நம் உடலில் தங்க மாலைகள் அணிவிக்கப்பட்டு நம் உறவினர்களின் வீடுகளுக்கு பண வசூல் வேட்டைக்காக சென்றதெல்லாம் உங்களில் யாருக்கேனும் ஞாபகம் வருகிறதா?

அன்று நம்முடன் விளையாடிக் களித்த நம் நண்பர்களில் எத்தனையோ பேர் இன்றில்லை (உலகில்) நம்முடன். அவர்கள் யாவரின் கப்ருகளும் இந்த புனித ரமளானின் பரக்கத் கொண்டு சொர்க்கத்தின் பூஞ்சோலையாக பிரகாசமளிக்கட்டுமாக.

இவ்வுலகில் நம்மை பல சூழ்நிலைகள் அடித்தாலும், உதைத்தாலும், விரட்டி அடித்தாலும், வாட்டி வதக்கினாலும், வறுத்தெடுத்தாலும் நிச்சயமாக நாம் இறுதியில் நம்மைப் படைத்தவனிடமே மீளக் கூடியவர்களாக இருக்கிறோம்.

நாம் விடிகாலையிலிருந்து அந்தி மாலைப்பொழுதுவரை உண்ணாமல், பருகாமல், பல நல்ல காரியங்களையும் செய்து வருகிறோம். எனவே நம்மைப் படைத்த இறைவனே நமக்கு நேரடியாக கூலி வழங்குவதாக குர்'ஆனிலே வாக்களித்துள்ளான்.

இந்த புனித ரமளானின் வணக்க வழிபாடுகளில் கேட்கப்படும் உங்களின் பிரத்யேக துவாக்களில் இந்த அன்பு சகோதரனையும் சேர்த்துக் கொள்ளுமாறு பணிவுடன் உங்களின் உறவினன்னாக கேட்டுக் கொள்கிறேன்.

பாலைவன பூமியில் வாழ்ந்தாலும்; உள்ளச் சோலைவனத்தின் தென்றலாய் உலாவரும் உங்களின் அன்பு நினைவுகளுடன்.

எம்.ஐ. நெய்னா முகம்மது
சவுதியிருந்து.

துபாயில் சர்வதேச திருக்குர்ஆன் மனனப் போட்டி ( www.quran.gov. ae ) செப்டம்பர் எட்டாம் தேதி முதல் 20 ஆம தேதி வரை துபாய் அல் மம்சார் பூங்கா அருகில் அமையப்பெற்றுள்ள கலாச்சார மற்றும் அறிவியல் கழகத்தில் நடைபெற இருக்கிறது.

இப்போட்டிகள் 1997 ஆம் வருடம் துவங்கப்பட்டு 12வது வருடமாக அமீரக துணை அதிபரும், துபாய் ஆட்சியாளருமான ஷேக் முஹம்மது பின் ராஷித் அல் மக்தூம் அவர்களது ஆதரவில் நடைபெற்று வருகிறது. இவ்வருடம் 85 நாடுகளைச் சேர்ந்தவர்கள் பங்கேற்க இருப்பதாக இப்போட்டிகளுக்கான ஏற்பாட்டுக்குழுவின் தலைவர் இப்ராஹிம் முஹம்மது பு மெல்ஹா தெரிவித்துள்ளார். முதல் முறையாக ஸ்விட்சர்லாந்து, உஸ்பெஸ்கிஸ்தான், போஸ்ட்வானா மற்றும் ஜான்சிபார் உள்ளிட்ட நாடுகள் முதல் முறையாகப் பங்கேற்கின்றன.

கடந்த காலங்களை விட ஐரோப்பிய நாடுகளைச் சேர்ந்த போட்டியாளர்கள் இப்போட்டிகளில் கலந்து கொள்ள மிகவும் ஆர்வம் காட்டி வருவது குறிப்பிடத்தக்கது. அல்ஜீரியாவில் இருந்து பங்கேற்கு ஒன்பது வயது மாணவர் பதேஹ் பாதி மிகவும் இளவயது போட்டியாளர். இந்தியா, பாகிஸ்தான், பங்களாதேஷ், இலங்கை உள்ளிட்ட நாடுகள் வருடந்தோறும் பங்கேற்று வருகின்றன.

இப்போட்டியினையொட்டி சிறப்பு தொலைக்காட்சி சேனலும் துவங்கப்பட இருக்கிறது. போட்டிகள் தொடர்பான நிகழ்வுகள் அனைத்தையும் உலகெங்கும் உள்ளோர் பார்க்கும் வண்ணம் இவ்வசதி செய்யப்பட்டுள்ளது.

இப்போட்டி நடத்தும் அமைப்பின் சார்பில் வருடந்தோறும் சிறந்த இஸ்லாமிய அறிஞர் விருது, அமீரக அளவிலான திருக்குர்ஆன் மனனப் போட்டி, சிறைக்கைதிகளுக்கான திருக்குர்ஆன் மனனப் பயிற்சி, இஸ்லாமிய சொற்பொழிவு நிகழ்ச்சிகள், திருக்குர்ஆன் அறிவியல் நிகழ்ச்சி உள்ளிட்ட பலவேறு நிகழ்வுகள் நடத்தப்படுகின்றன.

சிறந்த இஸ்லாமிய அறிஞர் விருதுக்காக தேர்வு செய்யப்படுவருக்கு திர்ஹம் ஒரு மில்லியன் வழங்கப்படும். திருக்குர்ஆன் மனனப்போட்டியில் வெற்றி பெறும் முதல் பத்து போட்டியாளர்களுக்கு முறையே திர்ஹம் 250000, 200000, 150000,65000, 60000,55000, 50000,45000, 40000,35000 வழங்கப்படும்.

இப்போட்டிகளுக்கான நடுவர்கள் சவுதி அரேபியா, எகிப்து, ஜோர்டான், நைஜீரியா, சிரியா மற்றும் போஸ்னியா ஹெர்சகோவினா உள்ளிட்ட நாடுகளில் இருந்து வருகை புரிந்துள்ளனர்.

தகவல் அனுப்பியோர்: சகோ முதுவை ஹிதாயத் மற்றும் சகோ. A.J. தாஜுதீன்,ஜித்தா

இறைவன் கடமையாக்கி இருக்கின்ற மற்றொரு வழிபாடு நோன்பாகும். தொழுகையைப் போல இந்த வழிபாடும் ஆரம்பத்திலிருந்து எல்லாத் தூதர்களின் மார்க்கங்களிலும் கடமையாகவே இருந்து வந்திருக்கிறது. முதலில் தோன்றிய சமுதாயத்தவர்களும் நோன்பு பிடித்துக் கொண்டிருந்தார்கள். என்றாலும், நோன்பின் சட்டங்கள், அதன் எண்ணிக்கை, அது நீடிக்க வேண்டிய நேரம் ஆகியவற்றில் ஒரு மார்க்கத்தும் மற்றொரு மார்க்கத்துக்கும் இடையில் வேற்றுமை இருந்து வந்தது. இன்றும் கூட பெரும்பாலான மதங்களில் ஏதேனும் ஒரு வடிவத்தில் நோன்பு இருக்கத்தான் செய்கிறது. ஆனால் மக்கள் தம் சார்பில் பலவற்றை இணைத்து அதன் வடிவத்தை கெடுத்திருந்தாலும் சரி! திருக்குர்ஆன் கூறுகிறது:

يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ 2:183

ஈமான் கொண்டோர்களே! உங்களுக்கு முன் இருந்தவர்கள் மீது நோன்பு விதிக்கப்பட்டிருந்தது போல் உங்கள் மீதும்(அது) விதிக்கப்பட்டுள்ளது (அதன் மூலம்) நீங்கள் தூய்மையுடையோர் ஆகலாம். 2:183

இதிலிருந்து நீங்கள் சிந்திக்கவேண்டும். எல்லாக் காலத்திலும் இந்த இறைவழிபாட்டைக் கடமையாக்குவதற்கு நோன்பில் என்னதான் இருக்கிறது?

நோன்பை தவிர்த்து மற்ற இறை வழிபாடுகள் எல்லாம் ஏதேனும் ஒரு விதத்தில் வெளிப்படையான செயல்களாகவே நிறைவேற்றப்படுகின்றன. உதாரனமாக தொழுகை, ஹஜ் போன்ற இறைவழிபாடுகள் பார்வைக்கு மறையாதவை. நீங்கள் நிறைவேற்றுகிற அதே நேரத்தில் அது மற்றவர்களுக்கு தெரிந்து விடுகிறது. நீங்கள் நிறைவேற்றாவிட்டாலும் தெரிந்து விடுகிறது.

ஆனால் நோன்பு நிறைவேற்றுகின்ற மனிதனையும் இறைவனையும் தவிர்த்து வேறு யாருக்கும் தெரிய முடியாது. ஒரு மனிதன் எல்லோருக்கும் எதிரில் 'ஸஹ்ரில்' சாப்பிட்டு நோன்பு பிடிக்கலாம். நோன்பு திறக்கும் நேரம்வரை அவன் வெளியில் தெரியும்படி சாப்பிடாமலும் குடிக்காமலும் இருக்கலாம். ஆனால் ஒளிந்து மறைந்து தண்ணீர் குடித்தால் அது இறைவனைத்தவிர வேறு யாருக்கும் தெரிய முடியாது. அவன் நோன்போடு இருக்கிறான் என்றே எல்லோரும் நினைத்துக் கொண்டிருப்பார்கள். உண்மையில் அவன் நோன்பாளி அல்லன்.

உறுதியான நம்பிக்கையின் அடையாளம்

நோன்புக்குறிய இந்தத் தனித்தன்மையை முன்னால் வைத்துக் கொள்ளுங்கள். அப்புறம் சிந்தனை செய்யுங்கள்; ஒரு மனிதன் உண்மையாகவே நோன்பு நோற்கிறான். திருட்டுத்தனமாக அவன் சாப்பிடுவதில்லை; குடிப்பதுமில்லை. கடும் வெப்பத்தினால் தொண்டை வரண்ட நிலையிலும் அவன் ஒரு துளி தண்ணீர் அருந்துவதுமில்லை. கடும் பசியினால் கண் பார்வை குன்றிப்போனாலும் அவன் ஒரு கவளம் உணவும் உண்ண நினைப்பதுமில்லை.

அந்த மனிதனுக்கு இறைவன் எல்லா மர்மங்களும் தெரிந்தவன் என்பதில் எவ்வளவு நம்பிக்கை இருக்கிறது! தன்னுடைய செயல்கள் முழு உலகத்துக்கும் மறைந்து விட்டாலும் இறைவனின் பார்வையிலிருந்து மறைய முடியாது என்று எவ்வளவு உறுதியாக அவன் நம்புகிறான்!

மிகப்பெரும் சிரமங்களையெல்லாம் அவன் ஏற்றுக் கொள்கிறான்; ஆனால், இறையச்சத்தால் தான் நோற்கின்ற நோன்பை முறிக்கும் எந்தக் காரியத்தையும் அவன் செய்வதில்லை என்றால், அவன் உள்ளத்தில் எப்படிப்பட்ட உறுதியான இறையச்சம் இருக்க வேண்டும்!

இந்த இடைக்காலத்தில் மறுமை குறித்து ஒரு வினாடி கூட அவன் மனதில் எவ்விதச் சந்தேகமும் தோன்றுவதில்லையென்றால், மறுமையில் கிடைக்கும் நற்கூலிகள், தண்டனைகள் பற்றி அவனுக்கு எவ்வளவு திடமான நம்பிக்கை இருக்க வேண்டும்! 'மறுமை வருமா வராதா? அதில் நற்கூலியும் தண்டனையும் உண்டா இல்லையா? என்று அவன் மனதில் சிறிதளவாகிலும் சந்தேகம் ஏற்பட்டு விட்டால், அவனால் தனது நோன்பை என்றைக்கும் நிறைவேற்றவே முடிந்திருக்காது.

சந்தேகம் ஏற்பட்ட பிறகு இறைக்கட்டளையைச் செயற்படுத்துவதற்கென்று எதையும் சாப்பிடக்கூடாது; எதையும் அருந்தக் கூடாது எனும் எண்ணத்தில் மனிதன் நிலையாக இருப்பது சாத்தியமான ஒன்று அல்ல.

இவ்வாறு ஒவ்வொரு வருடமும் முழுமையாக ஒரு மாதத்திற்கு தொடர்ந்தால்போல் முஸ்லிம்களின் இறை நம்பிக்கைக்கு தேர்வு வைக்கிறான் இறைவன். இந்த தேர்வில் மனிதன் எந்த அளவு வெற்றி பெற்றுக்கொண்டே போகிறானோ, அந்த அளவுதான் அவனுடைய இறை நம்பிக்கை வலிமை பெற்றுக்கொண்டே போகும். இது தேர்வுக்குத் தேர்வு போன்றது, பயிற்சிக்குக் பயிற்சி போன்றது.

யாரேனும் ஒருவரிடம் ஒரு பொருளை நீங்கள் அமானிதமாக ஒப்படைத்திருந்தால், அவருடைய நாணயத்தை பரிட்சை செய்து பார்க்கிறீர்கள். இந்த பரிட்சையில் அவர் முழுவெற்றி வெற்றியடைந்து தம்மிடம் ஒப்படைக்கப்பட்டிருக்கின்ற பொருளுக்குத் துரோகம் செய்யவில்லை என்றால் அமானிதம் சுமையைத் தாங்குவதற்குறிய தகுதி இன்னும் அதிகமாக அவருக்கு வந்துவிடும். அவருடைய நாணயம் மேலும் வளர்ந்துகொண்டே போகும். இந்த பரிட்சையில் நீங்கள் தேர்ந்துவிட்டால், இறைவனுக்கு பயந்து மற்றப் பாவங்களிலிருந்தும் ஒதுங்கும் மனப்பக்குவம் உங்களுக்கு அதிகமாக ஏற்பட்டுவிடும்.

அனைத்து மர்மங்களையும் இறைவன் நன்கு அறிகின்றான் என நீங்கள் உறுதியாக நம்புகிறீர்கள். எனவே எந்த சந்தர்ப்பத்திலும் இறைக்கட்டளையை மீறுவதிலிருந்து விலகி நிற்கிறீர்கள். யாரும் உங்களை பார்க்கது இருந்தாலும் சரியே! மேலும் வாழ்வின் ஒவ்வொரு திருப்பத்திலும், ஒவ்வொரு சந்தர்ப்பத்திலும் மறுமை நாள் உங்கள் நினைவிற்கு வந்து விடுகிறது. அன்றைய நாளில் அனைத்து இரகசியங்களும் அம்பலமாகிவிடும்.

செய்யும் நன்மைக்கு நற்கூலியும், தீமைக்கு தண்டனையும் யாதொரு தயவு தாட்சண்யமும் இல்லாமல் கிடைக்கும் என்ற எதார்த்த உண்மையை நீங்கள் உணர்கிறீர்கள். எனவே இறையச்சம் உள்ளவர்களாக திகழ முழு முயற்சி மேற்கொள்கிறீர்கள்.

FIQH COUNCIL OF NORTH AMERICA ANNOUNCEMENT FOR RAMADAN 1429 AND EID AL-FITR
---------------------------------------------------------------------------
Ramadan 1429: September 1, 2008
----------------------------------
The Astronomical New Moon for Ramadan is on Saturday, August 30, 2008 at 19:58 Universal Time (i.e., 3:58 pm EDT, and 12:58 pm PDT). According to the criteria adopted by the Fiqh Council of North America, and European Council for Fatwa and Research, [the conjunction before sunset and moon setting after sunset in Makkah] first day of Ramadan is on Monday, September 1, 2008.

Eid al-Fitr 1429: October 1, 2008
-------------------------------------
The Astronomical New Moon for Shawwal is on Monday, September 29, 2008 at 8:12 GMT, 4:12 am EDT, 1:12 am PDT). According to the criteria adopted by the Fiqh Council of North America, and European Council for Fatwa and Research, the first day of Shawwal is on Wednesday, October 1, 2008.
மேலும் விவரங்களுக்கு
http://www.isna.net/articles/News/FIQH-COUNCIL-OF-NORTH-AMERICA-ANNOUNCEMENT-FOR-RAMADAN-1429-AND-EID-AL-FITR.aspx

Older Posts Home

Top commentators

slide

slider

Popular Posts

video

recent scroll

news

blowup

carousel

top bar content

Recent Posts

dailyvideo

Recent Entries

Recent Comments

Photo Gallery